Dende Baleira todos os camiños lévanos o ARDE LUCUS
![](https://ocentrodedianacasa.igualdadebenestar.org/wp-content/uploads/2022/06/WhatsApp-Image-2022-06-15-at-12.44.47-PM-990x1024.jpeg)
O Arde Lucus é unha festa de interese turístico nacional celebrada na cidade de Lugo e que pretende lembrar a orixe romana e castrexa da cidade, enchendo de actividades culturais e didácticas o centro da cidade. Este ano celebrouse os días 9, 10, 11 e 12 de xuño.
O venres 10, as persoas usuarias do Centro de Atención a Persoas Maiores de Baleira (CAPM Baleira) acompañadas do persoal do centro, achegáronse a “Lucus Augusti”, tal e como lle chamaban os romanos a Lugo, para desfrutar deste ambiente festivo. A asociación “CAETRA LUCENSIUM” que debe o seu nome a unha antiga moeda utilizada polos romanos, abriunos as portas do seu campamento para que puideramos coñecer de primeira man os costumes que tiña esta civilización.
![](https://ocentrodedianacasa.igualdadebenestar.org/wp-content/uploads/2022/06/1654875587321-768x1024.jpg)
Foi unha visita moi enriquecedora na que nos ensinaron a fabricación destas antigas moedas, como elaboraban e servían a comida nas “Cauponas” e incluso a fabricación das súas propias vestimentas.
Para poder desfrutar ao 100% desta festividade, tocounos caracterizarnos como romanos e para iso, durante as semanas previas estivemos confeccionando as nosas propias vestimentas. Podedes ver unha mostra nas fotos. Só pasaron uns días e xa estamos desexando que chegue o próximo “Arde Lucus”.
![](https://ocentrodedianacasa.igualdadebenestar.org/wp-content/uploads/2022/06/Captura-de-pantalla_2022-06-15_12-26-01.png)
Moitas grazas a esta asociación por mostrarnos un anaco da cultura romana e facelo con tanto mimo, sen dúbida, voltaremos para o ano. Animámosvos a que no próximo Arde Lucus, lles fagades unha visita ao seu campamento (situado detrás da Igrexa San Froilán) pois paga a pena.
![](https://ocentrodedianacasa.igualdadebenestar.org/wp-content/uploads/2022/06/1654875587272-1024x1024.jpg)