Aquivos por Categoría: Movemos a mente

Noria no porto da Coruña

No centro de día de SADA quixemos facer unha actividade diferente, buscando non so desfrutar dunha saída e dun café, senon de traballar os sentidos.

Moitos dos usuarios nunca experimentaron a sensación voar; non viaxaron en avión, nin montaron en ningún tipo de atracción similar á noria.

A actividade tivo moi boa acollida por parte de usuarios e familias. Ó principio algunhas persoas eran un pouco reticentes a subir, incluso houbo familias que nos dicían que ó verse alí collerían medo. Pois todo o contrario. Foi unha mañá asombrosa.

Aproveitando que xusto no lugar hai unha terraza, todos puideron desfrutar dun cafeiño ou un refresco. E pouco a pouco fóronse animando a probar, ata que todos, excepto unha usuaria, subiron á atracción.

Destacar que os organizadores da noria en todo momento tiveron un trato exquisito cara os usuarios: baixaronlles o prezo da entrada, déronlles máis de unha volta e fixeron todo o posible para que todo o que quixese puidera participar. Varios usuarios en cadeira de rodas tamén tiveron a oportunidade de subir, xa que unha das cabinas estaba adaptada.

De volta ó Centro as caras dos usuarios eran incríbles. Grandes sorrisos e rostros de sorpresa. Viñan moi emocionados. Esta frase, dun dos usuarios participantes, resume todo: “fun polo aire”.

VISITA Á EXPOSICIÓN “PINGAS DE CORES” DENDE O CENTRO DE DÍA DE SAN SADURNIÑO.

A participación na comunidade e desenvolver actividades co seu grupo de iguais é un dos máis importantes beneficios que aportan os centros de día. Ademais, a pintura ten unha gran acollida no noso centro polo que sabíamos que ía a ser do seu interese .

Desprazámonos camiñando á casa do concello de san Sadurniño, moi próximo ao centro, onde se atopaba exposta a mostra “Pingas de Cores” que exhibe 26 cadros de artistas de distintos lugares de san Sadurniño. En concreto, o fío condutor das obras é precisamente a orixe das súas autoras -practicamente todas son mulleres e de san Sadurniño- posto que a temática dos cadros é moi variada.

Moi contentos e entusiasmados, gustoulles moito a exposición en si e o entorno posto que na Casa do Concello sempre hai moito movemento de xente e soen atopar a veciños e coñecidos cos que fai tempo que non teñen contacto. Ademais aproveitamos para pasear polos bonitos xardíns do concello, polo que a saída foi completa ao promover tanto a participación na comunidade como a mobilidade funcional.

VISÍTANOS A PROTECTORA DE ANIMAIS DE CAMBADOS

No CAPM de Cambados realizamos unha actividade conxunta coa protectora de animais do pobo https://refugiocambados.es/

Estas Terapias Asistidas con Animais teñen efectos moi positivos a nivel emocional para as persoas maiores: fortalecen a autoestima, melloran o estado de ánimo e aumentan a motivación pola tarefa. Os animais son un recurso terapéutico e convértense nun estímulo sensorial para as persoas do centro.

Este tipo de actividades facilitan a interacción entre as persoas usuarias e incluso chegan a rirse xuntos. Tamén promove a realización de actividades que implican movementos e desprazamentos podendo así fortalecer membros superiores e inferiores. As persoas maiores poden realizar actividades complexas que fortalecen a motricidade grosa e fina.

A actividade tivo unha moi boa acollida, a protectora trouxo unha cadela “Clau” e dous gatos; “Paolo” e “Estrella”. Realizaron a estimulación as persoas usuarias a través do contacto con ditos animais, animando a que os acaricien, peiteen, dean de comer etc. O contacto físico cos animais, axuda a reducir os niveis de estrés e mellora o estado de ánimo.

Así mesmo, os animais, tamén realizaron algunha técnica de habilidade (como por exemplo, saltos ou pasar entre os aros). A maioría das persoas usuarias amosáronse receptivas, e as persoas con máis deterioro cognitivo mantiveron unha comunicación afectiva cos animais. So coa súa presencia facilitan que se xeren novas dinámicas de atención.

A continuación ensinámosvos unhas fotografías!

Navegando polo Miño

Nas terras do Baixo Miño, a relación entre as persoas e as augas do Miño sempre foi moi estreita, e como non podía ser doutro xeito algunhas das persoas usuarias rememoran esta relación xa fose directa ou indirectamente con cariño e acordanza. No punto oposto atópanse aquelas persoas usuarias que nunca tiveron ningún tipo de contacto co mar e…. aínda máis, nunca montaran en barco, pero aínda así tiñan temor e ilusión a partes iguais por facelo, aínda que fose, unha vez na vida.

O centro de día de Tomiño púxose en contacto coa Asociación Vontade e co Clube deportivo “Sen Amarras”. Xuntos están a desenvolver unha iniciativa no marco do proxecto “Río Miño, Marca Inclusiva” co apoio da Deputación Provincial de Pontevedra.

A través deste proxecto, o xoves dezaoito de agosto sete persoas usuarias do centro de día de Tomiño xunto co persoal do centro emprenderon a viaxe cara o pantalán de Goián.

Alí estaban agardando por eles o persoal do Clube deportivo “Sen Amarras”. Foron os encargados de dirixir os dous barcos adaptados, nos que se facilitou a abordaxe de tres persoas en cadeira de rodas, a través do río Miño.

O percorrido foi dende o pantalán de Goián ata case a desembocadura do río Miño dende onde se contemplou a espectacular vista do Monte Tegra. Unha vez apreciada a vista, os capitáns deron volta ás embarcacións rumbo a praia da Lenta (Portugal), pasando por debaixo da Ponte Internacional da Amizade que une Tomiño e Vilanova de Cerveira. Foron arredor de dúas horas nas que navegaron polo leito do río Miño e nas que puideron desfrutar da natureza e dunhas vistas privilexiadas.

Desfrutaron do aire libre e do paseo en barco e aquí vos deixan unha mostra da experiencia vivida.