O Centro de Día de Ferrol-Esteiro abre as súas portas un 21 de xullo do 2014. É por iso que neste 2024 cumpre 10 anos en funcionamento, razón pola que consideramos axeitado festexar coas persoas usuarias, as familias e a veciñanza da nosa comunidade. Con motivo desta data, ao longo de todo o mes, as persoas usuarias elaboraron diferentes manualidades con pezas de arcilla e acuarelas, modeladas e pintadas por elas mesmas, para agasallar ás asistentes a esta xuntanza.
Así pois, na tarde do venres 19 de xullo, contamos coa actuación musical da Rondalla “Añoranzas” de Ferrol, que nos deleitou coa súa arte e ritmos amenizando o evento, aportando solemnidade e emoción a un momento tan entrañable como foi o compartido coas familias e a comunidade, no que cantamos, bailamos e merendamos todas xuntas.
Aproveitamos para deixar por aquí testemuñas gráficas do que foi un día tan especial para todas as persoas que asistimos.
