Tras un par de anos nos que non foi posible facer grandes celebracións por mor da situación sanitaria, este 2022 retomamos as festas por todo o alto para conmemorar o 11 aniversario da apertura do centro de día de Cospeito.
Para comezar, luns 23 de maio (día propio do aniversario) as persoas usuarias do centro de día representaron unha obra teatral para as súas familias e todos os membros da comunidade que decidiron achegarse a vernos e pasar unha entretida tarde canda nós. Coa obra “A mellor sopa de Cospeito” pasamos unha tarde moi divertida chea de risas. Unha vez rematada a obra, compartimos cos nosos visitantes uns contos e unha boa merenda.
Por outra banda, o xoves 26 de maio os Asubíos da Chaira amenizáronnos a tarde con pezas de música popular, as cales todos desfrutamos inmensamente! Foi unha tarde chea de cantos e sobre todo de baile, risas e moita diversión. Tras máis de unha hora de música, todos seguiamos pedindo máis, pois cando un o está a pasar ben o tempo pasa voando. Como agradecemento pola súa gran actuación e o seu bon facer, as persoas usuarias do centro de día fixéronlles entrega duns agasallos.
Para rematar coas celebracións, o venres 27 de maio contamos coa colaboración de XOTRAMU e o alumnado de 1º de EP do CPI Virxe do Monte de Cospeito para desfrutar dunha mañá de xogos tradicionais. Por unhas horas volvemos todos a ser cativos e desfrutar coma nunca con estes marabillosos xogos, escachando coa risa mentres competiamos a ver quen lograba marcar gol ou quen anotaba máis puntos.
