Aquivos por Categoría: Saúdos e recados

XUNTOS SOMOS MELLORES DENDE O CENTRO DE ORTIGUEIRA

Dende a residencia de ORTIGUEIRA nos contan que….XUNTOS SOMOS MELLORES

O confinamento polo Covid-19 levounos no CAPM de Ortigueira a cambiar rutinas, horarios e actividades; requeriu adaptar espazos para cumprir as medidas propostas polos expertxs e tentar así reducir ou minimizar o risco de contaxio. Desde antes incluso de decretar o estado de alarma, no centro xa nos recomendaron encarecidamente non saír ao mercado, a comer os churros ou a selar a quiniela, para evitar concentracións de xente.

A residencia é a nosa casa e ficamos nela. Unha casa grande onde se traballa arreo os 365 días do ano e moito máis nas circunstancias actuais.

Por este motivo, quixemos agradecerlle a todo o persoal a súa implicación, profesionalidade, capacidade e compromiso no coidado das persoas maiores, na nosa atención e benestar. Pintamos unha chea de mans, coas cores dos uniformes do persoal (verde, lila, laranxa e azul), xuntámolas, escribimos en cada unha o nome dxs traballadorxs e colgámolas en forma de guirnalda nos espazos comúns. Sumámonos así ao seu berro: “xuntxs somos mellores”.

Conservaremos na memoria este tempo de peche, lembrando o seu bó traballo e que grazas a elxs o becho non nos visitou.

ÁNIMOS DENDE O CIFP PORTA DA AUGA O CENTRO DE DÍA DE RIBADEO

As alumnas da formación en Atención Sociosanitaria do CIFP Porta da Auga fixeron prácticas no Centro de día de RIBADEO, e algo quedou nos seus corazóns… Achegaron un fermoso vídeo de ánimo

O día da nai con Rosalia de Castro

Miña nai, miña naiciña,
como a miña non hai ningunha,
que me quentaba a cariña
co calorciño da súa.
Miña nai, miña naiciña
como miña nai ningunha.
Lávame a miña camisa
dentro da manga da súa.

Vanesa, terapeuta ocupacional do Centro de día de ABADÍN, cantanos estes versos…

Tamén dende o centro de día de SAN SADURNIÑO, nunha data tan sinalada e especial querían formar parte das celebracións das nosas usuarias nais e achegarlles a través dun vídeo os nosos máis derradeiros agradecementos. Por todas elas, Feliz día da Nai!!

As mensaxes no centro de Ortigueira, medran con forma de árbore…

Desde comezos do confinamento no CAPM de Ortigueira recibimos unha morea de mensaxes de apoio, animando tanto ás persoas maiores como a todo o persoal que traballamos no centro chegando de maneira virtual a través do noso blogue Coamarea, por correos electrónicos ou por whatsapp. Aproveitamos que temos un taboleiro de cortiza no comedor, zona que visitamos varias veces ao día, para colocar a nosa “árbore da vida” no centro e ir enchendo de follas de cores, según ían chegando as mensaxes de ánimo e recoñecemento polo traballo realizado.

Son circunstancias especiais nas que se agradece o ánimo recibido e o recoñecemento a tódolos equipos de persoal que traballamos nos centros de maiores.